اوڏڪِي ٻولِي ائُون اوڏ برادرِي چِي ترقِي چِي تنظِيم (OLCDO) اوڏڪِي ٻولِي نُون ترقِي ڏِراوَڻي ڪاڻ ڪام ڪرَي ڇَي پلِي۔ امچا وشواس ڇَي تہ امهِين اوڏڪِي ٻولِي نُون ترقِي ڏِيڻي سُون ائُون تعليم عام ڪرڻي سُون اوڏ برادرِي نُون ترقِي ڏِرا سگھُون ڇئُون۔ دُنيائِي ۾ ڪِترِيا ئِي ٻولِيا ختم هُتِي گيليا هِتِيا ائون ڪِترِيا ئِي ٻولِيا ڏُوجِيان موٽِيان ٻولِيان چي اثرا چي ڪاڻ ڪتِي ختم هُوڻي هاڙِيا هِتِيا۔ ٻولِي نُون بچاوڻي چا رُگا هيڪچ طرِيقا ڇَي تہ ويهچ ٻولِي ۾ لِکلَي جائو ائُون ثقافت، رِيتا رسمان ائُون ڏُوجيان باتان چي باري ۾ تحقِيق ڪتِي لِکلَي جائو.
امچي اِداري ۾ ڪام ڪرڻي هاڙان چِي لسانِيات مضمُونا ۾ ٽرِينگ گيهوڙِي ڇَي ائُون امهِين الگ الگ نمُونا چِي تحقِيق ڪرُون ڇئُون، مثال: ماڻسان چي ريهڻ سيهڻ، ريتا رسمان چي باري ۾ تحقِيق، سماجي لسانِياتِي تحقِيق جڪا ۾ ڏيکجَي ڇَي تہ ڏُوجِيا ٻولِيان چا آپلِي ٻولِي پر ڪِترا اثر هُوَي ڇَي، آپڪي ٻولِي ۾ ڪِسي آواز هِتِي ائُون اُونهان نُون لِکڻي چا طرِيقا ٺاهوڻ، گرامرا پر تحقِيق جڪا ۾ ٻولِي چِي گرامر لکجَي ڇَي، ڊِڪشنري، جڪا ۾ لفظان چا مطلب ائُون استعمال وغيرہ هُوَي ڇَي۔ امهِين جا سِگڙِيا باتا برادرِي چي ماڻسان کن انٽرويُو گيهتِي ائُون آپ مُشاهدا ڪتِي پڇي لِکُون ڇَئُون۔
امهان کن 70 کن مٿي انٽرويُو رِڪارڊ هُئوڙي هِتي ائُون ڪمپيُوٽرا ۾ لکوڙي هِتي۔ امهِين ٻاڙان ڪاڻ اوڏڪِي ۾ ڏون ڪهاڻِيان چي ڪتابين ڇپالين هِتين جڪان ۾ ڦُوٽُون بِي لاگوڙي هِتي۔ امهِين ڏُوجين بِي گھڻي ئِي ڪتابين ڪمپيُوٽرا پر ٺاهلين هِتين پر امهين تاڻِين ڇپڙا ڪونهِي سگھلي ڇئُون، مثال: ڪهاڻِيان چي ڪتابين، صحتِي پر ائِون بيماريان چي باري ۾ ڪتابين، سماجِي مسئلان پر ڪتابين، ماڻسان چي ريهڻ ڪرڻ، ريتان رسمان چي باري ۾ تحقِيقي مقالي، لسانِياتِي تحقِيقي مقالي، اوڏڪِي لفظان چِي لِسٽ، گرامرا پر تحقِيقي مقالي وغيرہ۔ امهِين اوڏڪِي ڊِڪشنرِي پر بِي ڪام ڪرُون ڇئُون پلي۔
